讓自已的故事從頭開始

第一次影 slide，用 Fujifilm RVP 100。

顏色，感覺都同數碼好唔同。

每張相都要諗好耐先敢影。

 

六月二十三日，同師兄姐上佛山三水荷花世界影相。

*

Day 1

清晨五點半起身，拖住喪屍一樣既身軀，

坐車去旺角集合，之後再一齊坐直通巴士去佛山。

佛山三水荷花世界，係世界上規模最大的荷花園。

該公園佔地千多畝，種植著三百幾種荷花。

三水荷花世界於2005年，獲全國旅遊景區品質等級評定委員會，

評定為“國家AAAA級旅遊景區”。

 

經過四個幾鐘頭車程，終於到達我地既目的地 ~ 佛山三水市。

很榮幸，Joe 哥通過香港攝影界既老前輩，

聯絡到國內以拍攝荷花聞名既溫涼大師。

 

溫涼老師，荷風堂主

中國攝影家協會會員，

廣東省書法家協會會員，

廣東省攝影家協會會員。

 

溫老師 03 年 亦曾黎港在中央圖書館舉行過名為 『荷風蓮韻』的攝影講座。

係酒店大堂等左一陣，溫老師就黎到搵我地。

溫老師為人親切，談笑風生，仲為我地搵位安排中午飯，

在飯局中，溫涼老師更為大家略略講解一下拍荷花的心得及技巧。

飯後，還為我地安排交通同公園入場年票既安排。

 

因為天氣極之炎熱，熱日當空，溫老師建議大家各自上房休息。

到下晝四點出發去荷花世界，大家經過十五分鐘既車程，

計埋司機十三個人屈係架面包車入面，最後果排真係焗到出唔到聲。

 

公園面積極大，主要分觀荷台，觀荷亭，睡蓮區，品種觀賞區，

王蓮區，荷花極多，影左幾個鐘，都係影左觀蓮區同浸月亭既花。

觀蓮區內都種滿荷花，雖然今日既荷花未算開得非常盛放，

但比起香港影開荷花的地方真的靚得多。

 

唔經唔覺，影到天黑，雖然大家都影到唔想走，

但係因為約左老師食晚飯，唔走唔得。

雖然係咁，不過大家都盡量燃燒菲林 CF咭，留守到最後一分鐘。

 

 

返酒店換件衫再去到酒家食晚飯都八點，

去到酒家，溫老師因為見我地遲黎，怕過左晚市，

所以己經預先幫我地搵到位、點好菜，十二個人十二個菜，

再加埋甜品生果都唔過二百五蚊。

總之，一切盡在老師控制之內。

 

 

食完飯，步行 10 分鐘，到老師既 荷風堂工作室。

入到去，見到老師既作品，無論，照片、字畫、詩詞，

都有令人目不瑕給既感覺。

 

溫老師再從電腦揀出他將會出品既畫集，逐張講解，

而遇到我地既發問，都很落意一一回答。

過程中，老師帶出一個好重要既觀念，就是 ”不區一格”。

不必在意時間、地點、環境、光線、構圖…種種型式上既局限。

 

更指出，要我們多看畫展，多聽多看藝術有關既展覽，

多吸收、增加自已既藝術修為。

首先要打好基礎，而影荷花，畫面構圖、色彩、明暗、對比、光影…

要簡潔，做好一切基本功，才進一步增加自己創意，忌未學行先學走。

 

過程中，溫老師經常問我地有無睇過 簡慶福、陳復禮、

黃貴權和顏震東等 香港攝影名家既作品。

講真，除左因為有次睇內地既攝影雜誌有專訪過簡慶福先生，

所以有印象之外，其他既名家我完全唔楚清。

作為香港人，講起來真係慚愧 。

 

雖然可能係經個短短個多小時既講解，但感覺獲益良多，

尤其老師用一個內地人過客身份，用一日既時間，

拍攝左一輯以香港繁忙都市為題既作品，令我有開眼界。

也令我對攝影有一種從新既體會，更加感受到今日所影既相不足之處。

 

離開荷風堂工作間，都己經係十一點幾，

經過未關門既麵包鋪，補充下麵包糧水再步行返酒店。

 

*

Day 2

清晨四點半起身，準時五點出發，

雖然好倦，但難敵對攝影既熱誠。

日出既荷花，又有另一番感覺。

 

 

經過一晚既思考，開始觀察一 D平時忽略既事物，

5個鐘頭，轉眼就過，大家返酒店食個豐富既早餐，

然後就上房休息下。

 

一點三，我地到大堂習合交房，之後又食個好豐富既午餐。

 

其實兩日既行程都到尾聲，食完餐咁勁既午餐之後，

大家抱住個肚去巴士站坐直通巴士返香港。

*

兩日既佛山荷花之旅就咁結束，

好開心通過 DChome.net 搵到一班志同道合既影友，

能夠有機會經常參與唔同類型既活動。

而今次最大既收獲當然係拜會左溫老師。

雖然溫老師講既野唔能夠令我有即時既進步，

但相信經過果晚講解，會慢慢增加對攝影既了解同領會，

將來對攝影技術有莫大幫助。

本來想寫三水遊記，不過又無頭緒。

睇報紙，最近都幾多唔好既新聞，睇完個心幾唔舒服。

*

小朋友 5P 單野，又有班人走出黎講香港性智識幾咁不足，

其實而家性智識仲唔夠多？就連大學生都有幾頁情色版。

我諗，而家 D 小朋友既性行為智識可能比我仲叻。

但係咁多年，點解無人講下愛智識既？唔通個個都識愛人？

講真，我就唔係太識咩叫愛。

*

醫院最近係咁出錯，

我諗作為受傷者既家人、朋友，絕對唔能夠接受有咁既意外發生。

但係，作為同事，好明白前線既壓力。

工作量不段增加，但時間、人手跟本不足，依個己經係結構性既問題。

以前睇野好簡單，對就係對，錯就係錯。

人大左，多左諒解同學識企係對方角度黎諗。

總之，希望唔好再聽到依 D 咁唔開心既新聞啦。

係。

愛在沉溺自己的寂寞，我承認依句。

我一直追求天長地久，但唔相信有天長地久，

希望能夠証明，但又証明唔到，好矛盾？

唔開心，飲左酒，我會盡情寫野，

寫寫寫，寫寫寫，抒發自身缺陷同傷感。

 

有 d 記憶，

不會留意佢在何年何月銷聲匿跡，

過了一段有如影印既日子，

直至某年某月某事某地，再次同記憶重遇，

勾起一陣難言既唏噓，驚覺身邊一切在改變，

惋惜失去了真正既自已。

這個”我”，去了什麼地方。

現在那個”我”，又是誰。

唉，真係日頭唔好講人，

前日先講完同甲女友去赤柱食飯既事，

其實分手後再無同佢聯絡過，都兩年幾啦，

今日無神神就收到佢既 email 。

 

話說佢帶左呀囡去影樓影相，佢知我好錫呀囡，

所以 send 返 D 相比我睇。

其實，當年養呀囡果時，己經講好每年帶甲女友同呀囡去影樓影輯相。

而自已亦暗下許願，如果有機會學返影相，自已一定要影到囡囡靚靚。

曾經亦諗過，如果有能力，將來想開間寵物既影樓，

當然，以我既技術，真係發下夢算。

不過之後既事，唉，諗都唔敢再諗。

 

講返 D 相，可能係細 size 既關係，雖然捕捉到表情，

但硬係覺得D 相爆爆地，好一般，無乜色水。

呀囡下個月 3 歲啦，點解個樣仲咁可愛架，

真係想咬咬咬死佢， 不過，好似肥左好多。

Herbie 仔 都就快 2 歲，但係點解咁大隻，仲大隻過肥囡。

妹豬幾時都係咁 Lady，咁底錫。

 

   

 

 

 

雖然心情因為收到依個 email 變得好底落，個心有 D 野頂住頂住。

不過都好安慰， 見到呀囡佢地生活得咁好，平平安安，肥肥白白。

我亦衷心祝福甲女友搵到自已既幸福。

*

Um………做咩近排係咁祝福人，而家又轉下牛角尖咁，

如果唔係屋企人係到，今晚又要開支酒飲先訓到。

我諗，都要將 D 酒收入房先得，有咩事隨時飲得。

上星期影荷花，影得麻麻，星期六，上去佛山影相，

希望今次可以影到滿意既相啦。

一個人係屋企，無無聊聊，

隊左成支紅酒，而家暈暈地，頭痛痛。

*

當我從 viewfinder 望地依個畫面，令我想起她。

 

好多時，人同人既關係，都係由 timing 決定。

她，是無論是性格，外貌，都係我夢中情人。

有人問我，點解唔去追佢？

我諗，都係 timing 問題。當我單身既時侯，她有男朋友，

當佢單身既時侯，我有女朋友。

亦可能係我自卑，明白到，當開始既時侯，就己經係結束前既倒數。

最後，我們既關係只係知己，我亦都好樂意保此依種關係。

幾年無見，剛剛收到佢通知，她就快會結婚了。

我衷心恭喜佢。