讓自已的故事從頭開始
2007年12月26日
■ 以前
以前，以為係時間問題，
總以為以前 D 野好食 D。
我係響上水長大既，幼稚園果時，
由九龍城塞搬入上水，睇住佢由一片農田變為城市。
從細都體弱多病，呀媽一個星期差唔多要帶我睇三次醫生，
每次從石湖墟行返彩園村果時，緊會幫襯橋底呀婆既 缽仔糕。
缽仔糕係放響小瓷碗用蒸龍蒸熟，有黃同白色兩種。
不過幫襯幾年之後，就無再見過呀婆個車仔檔了，
而我，亦好少響香港，除左深水步生隆之外，
好少再見到有人用傳統蒸龍瓷碗缽仔糕了。
仲記得小學果時跟同學出旺角，
當年好大件事架，第一次唔係同屋企人出旺角 wo，
當日既午餐，就係去左”樂園”食牛腩牛圓河。
當年既”樂園”，佢既牛圓真係有幾個呀叔坐響街邊用鐵棍打，
而牛腩就係清湯腩，好少河粉，
食完，唔會好飽，因為好少粉，只岩岩夠飽，
但每次總有一份好滿足既感覺。
而家，雖然 D 圓都比其他鋪頭好味，
但好似轉左人整，而家粉麵太多，
牛圓亦唔係新鮮用手打了，可惜。
以前既旺角，同而家既旺角其實差唔多，
當然，當年唔會有咁多人。
去好景抄錄音帶，抄大 Floppy 電腦 Game，
去女人街、荷李活買衫，去信和睇手辦公仔。
上到中學，響粉嶺返學，放學就響聯和墟補習。
記得補習社樓下個十字路口，每日都有好多小販擺檔，
雞蛋仔、炸大魚蛋、牛雜生腸、蠔餅、碗仔翅、鹽焗雞臂…
每日，我地就買一大堆返上樓食。
以前仲未起海聯廣場，果道係一排排既鐵皮木屋，
每日中午 lunch，就成班同學沖去果道食 牛媽車仔麵，
好記得果道既炸豬油渣，而家食唔返。
十幾蚊，大大個麵，仲有幾個菜，加上冬菜蔥花。
其實食得咁快咁平，只不過係為左坑幾蚊去後面既 夏日城打機。
至從海聯起左之後，牛媽就唔知仲有無做了。
再大D，屋企環境唔好，要半工讀，
一到五六點，就會食聯和墟既四眼仔腸粉，
睇住佢由細鋪，到擺街邊檔，再搬返入大鋪，
而家每於經過，都見到條好長既人龍。
中午，通常會買舊街市入面既 咸菜雞飯加薯仔汁，
不過至從舊街市火燭之後，就無再食過，之後佢地都無做了。
再唔係，就食好出名既 群記豬手麵。清湯豬手，加上炸圈，真系好好味，
可惜近年，佢地己經唔用新鮮豬手牛圓了，
味道，比以前差得多，不過仲係咁多人排隊。
至於無變，上水廣成冰室可以話十幾年都無變過，
餐牌上面都係賣果 D 野，
無味精牛肉通粉、西多、菠蘿油、手刨紅豆冰。
逢星期六日，就會迫滿晒人。
我其實對食，無乜挑剔。
原來，最好既，細個果時己經食過。
而家，只能回味。
Posted in: 隨心 |
按此回應 | 回應的RSS | 暫時未有引用通告| 
(0)
2007年12月24日
■ 星期日
原來又到聖誕。
講起就比朋友笑，我只係知返埋星期一就放假，
但就搞唔清楚邊日係平安夜，邊日係聖誕節。
講真，可能一直無為意，
慢慢，就會將所有淡忘。
*
今日本來想去睇 JC 攝影展，
不過朋友誤會左我想睇 Terry Richardson，
其實色情同藝術係一線之差，都係睇攝影人既心態。
從佢部Yashica T4，睇到被攝者最自然流露既本質，
加上佢意識大膽，充滿色情味既個人風格，
唔怪得佢成為時尚界數一數二名攝影師。
展覽入到，除左有 Terry 既相之外，
仲有香港 Michael Lau 既插畫，
插畫主題以兩個人分別對A 至 Z既演譯。
可惜結果睇完 Terry Richardson 都夠鐘返過旺角睇戲。
為有下次先再去睇 JC 既攝影展。
*
睇完 Terry，勾起我買部 snap 機條根。
之前睇過 RICOH R1S，Olympus mju2，Yashica T5 D 色又唔岩心水。
GR1v，Minolta TC1，Contax T3，出黎 D 色水各有不同，自已都好鐘意，
但可惜貴到無朋友，比人炒起晒。
Xpan， P's 依類更加唔洗諗，玩唔掂個構圖。
*
睇完 “I Am Legend”，
唔係唔好睇，但又唔好好睇。
只係覺得，DNA 改做，比核武更可怕，
但人類己經行緊一條不歸路，
可能，人類本來就有自毀既天性。
Posted in: 隨心 |
按此回應 | 回應的RSS | 暫時未有引用通告| (0)
2007年12月11日
■ 咬俐
響潮汕返黎之後，就一直病。
食西藥，食都個人好腫，腫到似豬頭。
轉睇中醫，食左兩日藥就好返大半，
再食多兩日就好左九成，連水腫都清左大半。
就響上個星期一差唔多好返既時侯，
食飯果時咬到條俐，仲流晒血，痛到連飯都食唔到。
其實唔係第一次咬到自已，不過估唔到咁嚴重。
第二日睇返，個傷口有一片手指甲咁大，
情況就好似同時生左三粒巨型飛滋咁。
跟住果幾日，係咁搽吻百密，但講野都痛，仲要黐晒俐根。
至於食野，剩係可以食流質食物，
結果，每日都係早餐麥皮，中午粹米線，
晚餐一係食粥，有時痛到飲杯奶就算。
*
繼上次鹿頸迷路之後，今次又去髻山又迷多次，
今次仲要衰到比人鎖響圍欄入面，好采最後都走到。
不過錯有錯著，比我發現左吳屋村依個地方。
感覺上好似大生圍，但比大生團少左一份人氣，
多左一份自然氣色。
*
條俐到星期六晚都仲係未好，把心一橫，
走去用鹽封住個傷口，真係痛到我彈下彈下，
眼水都流埋出黎。不過講都唔信，經過彈幾次 之後，
星期日訓醒，終於講野清楚返，仲食到野。
幾時都話，對自已要殘忍 D 先得。。。哈。
*
星期日無野做，自已一個出左電影中心睇”神探”，
雖然有 D 地方講唔通，但係真係幾好睇。
散場果時除左我依類一個男人去睇戲，
竟然發現有女仔自已去睇戲，感覺比較怪。
之後行下街，買下唔等洗既野就返屋企。
Posted in: 隨心 |
回應(2) | 回應的RSS | 暫時未有引用通告| (1)