讓自已的故事從頭開始
2008年03月28日
■ 開平。碉樓
襯復活節幾日假期，參加左平雕樓三天攝影團。
*
走出深圳羅湖關口，幾經辛苦，穿過一望無制既人潮。
終於到達華橋酒店習合，旅遊巴從深圳出發，
經過三個小時車程，正午抵達開平市。
我地先去飯店食中午飯，一嘗當地著名既黃鱔煲仔飯，
特別銘謝食神 Joe 哥出錢請大家食白切羊片，果碟羊片真係好味到震，
加上隊支大曲，爽呀。
*
飯後，最先遊覽既地方係馬降龍碉樓群，
馬降龍碉樓群由五條村碉樓組成，只計馬降龍村就己經有十幾座碉樓。
開平碉樓，源於十九二十世紀初，華橋晌異鄉賺錢回鄉，
眼見開平治安好差，土匪橫行，
就設計左依類碉樓建築，集防匪及居住於一身。
另外，華橋因為吸收左西方文化，
碉樓外型似西方堡壘，每座大約四、五層高，
每層普遍都係密封式石牆，所有窗戶都裝上粗鐵枝窗花同厚鐵板，
而牆壁上開設槍孔，方便屋內既人開槍。
上層，設有突出牆外既建築，方便觀察。
其實，碉樓群入面都分好多種類既建築，
而最主要分為更樓、眾人樓同碉樓三類。
『更樓』，一般比較矮細，通常建於村口位置，作用就好似現代既保安亭。
『眾人樓』，以前開平治安比較差，而交通又唔係好似而家咁方便，
好多人入夜之後，返唔切屋企，就會留晌眾人樓過夜。
而碉樓，因為大都係海外華橋興建，主要作居住同保安，
而晌設計方面，總多帶點西方色彩。
*
馬降龍有十五座碉堡，可惜只有駿盧同林駿盧開放。
個團行程緊密，由於有十二個景點要參觀，
好快，我地就要離開馬降龍碉樓群，
而天氣，就由果時開始，慢慢變壞。
*
轉個彎，我地就去到第二個景點，
其實果處只不過係個小山坡，不過從小山坡望過去，
就可以見到稱為『開平第一樓』既瑞石樓。
再轉個彎，就到左第三個景點『斜樓』。
斜樓因為鄰近魚塘，地基慢慢被侵食，
到而家己經傾斜左三十度，所以就變左景點。
離開斜樓，從巴士望出去，路邊時不時都會見到好多唔同型式既碉樓，
有好多，己經被棄置， 落莫咁座落晌路邊。
相比起己經成為展覽場、掛滿晒解說牌既碉樓，
依類孤寂、被遺忘既碉樓，反而有一種唔同既味道。
依類孤寂、被遺忘既碉樓，反而有一種唔同既味道。
好快，就到左第一日行程既最後一站 『土樓』。
行左大半日，其實對住咁多碉樓都開始感覺到悶，
反而對週圍既村童仲感興趣，佢地好似有無窮精力，
仲不段擺唔同既動作比我地影相。
離開土樓，都差唔多天黑。
大家去飯店食夜晚飯，再嘗開平著名既黃鱔煲仔飯………
好奇怪晌廣東食飯無雞鴨鵝食，問下導遊，原來廣東爆發流感，
所以遊行社取消晒全程既雞鴨鵝，怕我地食完有咩事…
食完飯，返酒店，
入到大堂真係嘩一聲，攝影團依兩年參加過幾少，
咁靚既酒店都係第一次見，不過，
因為我係單丁友，最後被分派到同司機一間房，
心諗，有無搞錯，我係客，有比錢，要同司機一間房。
而最主要係我又唔識個司機，又唔知佢係乜人，財物自身安全難免膽心。
不過無謂要人難做，何況見司機都斯斯文文，自己小心算數。
*
第二日一早，就晌酒店食左個好豐富既自助早餐。
講真，大陸攝影團黎講，真係算好唔錯，最少唔洗食急凍饅頭。
早餐之後，就出發去今日我地第一個景點『自力村碉樓群』。
當到達村口停車場，本來個天己經灰灰地，
但當我地一落車就開始落微雨，都未行到去銘石樓，
己經狂風大雨，都唔洗十分鐘既路程，
有遮都全身濕晒，狼狽非常，好彩大家個相機袋都防水。
有遮都全身濕晒，狼狽非常，好彩大家個相機袋都防水。
見到自力村既碉樓，發覺同之前一日睇既碉樓又唔同，
碉樓樓身比較高大，無論內外建築風格、擺設都比較西化。
睇得出住晌自力村既碉樓既人，係比較有富有既。
離開自力村，
大家都濕晒身，筋皮力累咁去『立園』食我地既中午飯。
當然，話明中午飯，我地緊係要再再再品嘗開平著名既黃鱔煲仔飯………
繼續睇住其他團食好出名既肥鵝，而我地果團就繼續無雞鴨鵝 。
西洋菜好清甜，炒菇好好味，而炆南瓜就保持一貫水平… 一貫無乜人食既水平。
食完飯，精神晒，眼見雨勢亦己轉弱，
不過好景不常，有時真係唔好唔信邪，
所謂 『Joe 哥連開十鋪魚，Jack 哥出門招風雨。』
當大家踏出飯店後，大雨又繼續熱情咁招呼我地。
*
『立園』入面可以講係金碧輝煌，私人運河、小橋流水、
巨型花園，仲有別墅、觀雀園… 就連風水老虎山都有一大座。
所有建築，無疑好出色，雖然好可觀好靚，
但總覺得係一座活墳墓，一座座精雕細鑿既監獄。
其實等如清代家具、魏晉駢文，雕琢浮華之後，再無以為繼。
晌入面行左陣，更加比我有種住晌好靚既鳥籠既感覺。
聽完園主同四位夫人既故事，望住佢地既靈位，
只感到紅顏活不長，靈位上的玉照更令人慨歎，薄命紅顏。
離開立園，途經好出名既方氏燈樓，
可惜大家都比雨淋到傻左，完全無落車既意欲。
可惜大家都比雨淋到傻左，完全無落車既意欲。
最後大家決定去埋『赤坎古鎮』就返酒店，唔再去其他地方。
到達『赤坎古鎮』，本來太倦無乜興趣落車，
不過又比堤西路河邊一排排騎樓吸引住，
最後都係忍唔住要落車行下。
而家晌香港舊區，都好易會見到一幢幢舊式騎樓，
但己經無機會好似赤坎古鎮咁，三四條街一字排，
無論建築風格、高度都一致既騎樓。
『騎樓』其實係南方既一種特殊建築設計，
通常將地下果層部分建成走廊，而走廊上面就係一樓樓層，
通常將地下果層部分建成走廊，而走廊上面就係一樓樓層，
睇落去好似一樓騎住地下，所以叫做騎樓。
因為騎樓既設計能夠令行人不必受日曬雨淋之苦，
亦係舊事代既步行街一種特色。
本來依類設計好實用，但可惜我地己經好西化，現代既設計，浮誇為主。
我地己經變得全盤接受左西方既標準，忘記左其實仲有另一個標準，
而且好可能係更好既標準。
行到街尾，發現有個小朋友晌度練槍法，
好奇望望，發覺原來係間跌打館，個師父仲好鬼嚴厲咁教個細路。
見師父咁鬼嚴，開頭都驚驚地，
膽粗粗問佢比唔比影相，不過佢又話無問題。
雖然師父外表好嚴肅，又大大隻，雙手仲紋晒身，
不過講粗口唔代表無教養，講野大聲亦唔代表個人無禮貌，
做人又點可以只睇表面，同師父傾落，仲發覺佢原來好鬼好傾。
師父話，其實晌佢 曾太公呀爸果代(咁其實係咪叫曾曾太公) 己經晌開平開館，
之後展轉過左美國唐人街，到佢依代，又返黎開平設館。
而個『武林之光』個牌面，更加係唐人街果邊洪門宗親岩岩送黎。
一路用 MacBook 上網，一邊聽 Hip Hop，
仲飲埋功夫茶，咁型既師父，去邊度搵。
返到酒店，沖過涼，換過晒濕衫，成個人爽晒。
達左晌床休息陣，又夠鐘食晚飯，
今次我地留晌酒店中菜廳食飯，
今餐再無黃鱔煲仔飯食，今次夠特別啦，我地食白飯。
Jack 哥仲加送『巨型鵝蛋』，然之後再示範『生雙蛋溝白飯』。
最後，版友 ST 眼見大家餓雞餓左太耐，所以出錢請大家食隻炸子雞。
終於明白，咩野叫 T 骨。
第三日，亦係行程既最後一日，照舊晌酒店食個既自助早餐。
今日天氣唔錯，最少無落雨，
今日既行程只得兩個，就係 『迎龍樓』同 『加拿大村』。
*
迎龍樓建於明朝，距離而家己經有四百幾年歷史，
第一第二層建於明朝，而第三第四層就晌民國期間加建。
正因為迎龍樓歷史悠久，無受到近代西方建築既影響，
所以形態上，跟其他碉樓風格好唔同。
行左一陣，我地就起程去 『加拿大村』。
依度由加國華橋出錢興建，故名加拿大村，
村被田園包圍，入面，有十幾座古民房同一座碉樓，
成條村，而家己經無人住，只得村長同佢隻狗晌度作為管理。
村長特別開左一間屋比我地入去參觀，
晌中國建築入面，無輪窗花、扶手，都會經常見明暗既光影設計，
而所謂窗牖，簡單講牖就係指按上牆上既通花。中國人既牖通常以雲作紋理。
雲為陰，與日光組合，地上就會出現陰陽明暗。
陰陽明暗，因時而變，亦係中國式建築、園林既設計目標。
離開加拿大村，旅程亦到尾聲，
我地就到附近關帝廟側邊既飯店用午膳，
多次同導遊反影，晌開平既最後一餐，
終於有雞有鵝食，而實在太感動。
而可憐既炆南瓜，都係保持無乜人食既作風。
我屋企人都係拜關帝，
食完飯行返去關帝廟睇下，
聽講，開平關姓係大族，
聽講，佢地好多係關雲長既後人，
聽講，有個直系關二哥後人，比美國，中國元守接見過，
聽講，呀關二哥後人，仲係乜乜上市公司、同鄉會主席。
不過，事實係咪咁呢？一來無從考究，
二來關我咩事，其實我好怕依類咩咩後人，
先人係咩咩咩好，唔通後人都係咩咩咩？
其實，有咩咩咩光好蹈。
晌關帝廟門前，見到正門有個牌大大個字寫住 …
『赤坎古廟 歡迎參觀 洗手間』
唔………(無言)
飲飽食醉，連廁所都參觀完，
大家就踏上歸途。
晌巴士上，導遊小姐提我地兩封簽証明書，
一封係証明我地有景點未去晒，係我地自已選擇唔去，唔關旅行社事。
另一封就係証明過我地硬係要食雞，導遊無晒我地辦法，
如果我地有咩大吉利事頭暈身興發燒發冷流感情況，都唔關旅行社事。
大家睇下左上角第一個簽名，
唔知邊個叫『吳x雄』呢，個簽名真係可愛到不得了。
三日既旅程好快結束，雖然天氣好差，影既相亦唔多。
中間果日落大雨，其他兩日天灰灰，可能影響我地影相心情。
但係唔落雷雨，唔水浸，唔洗困晌酒店，又無暴動，仲唔還神咩。
明白到做人有禍有福，多福要還神，
少禍更加要感謝神恩，其實少禍，亦己經係福。
要知道，一吹雞，有十幾個志同道合既傻佬傻婆，
同你一齊去淋雨，夫服何求。
何況，發覺每去一個地方，只要用心去研究，總有得著。
何況，發覺每去一個地方，只要用心去研究，總有得著。
做人要時時心存感恩， 無輪我地付出過幾多，
得到既，總比我地應該得到既多。
Posted in: 隨心 |
按此回應 | 回應的RSS | 暫時未有引用通告| 
(0)
Trackback 路徑
http://edhk.mocasting.com/main/wp-trackback.php/154178
暫時未有回應