見師父咁鬼嚴，開頭都驚驚地，
膽粗粗問佢比唔比影相，不過佢又話無問題。
雖然師父外表好嚴肅，又大大隻，雙手仲紋晒身，
不過講粗口唔代表無教養，講野大聲亦唔代表個人無禮貌，
做人又點可以只睇表面，同師父傾落，仲發覺佢原來好鬼好傾。
師父話，其實晌佢 曾太公呀爸果代(咁其實係咪叫曾曾太公) 己經晌開平開館，
之後展轉過左美國唐人街，到佢依代，又返黎開平設館。
而個『武林之光』個牌面，更加係唐人街果邊洪門宗親岩岩送黎。

一路用 MacBook 上網，一邊聽 Hip Hop，
仲飲埋功夫茶，咁型既師父，去邊度搵。

返到酒店，沖過涼，換過晒濕衫，成個人爽晒。
達左晌床休息陣，又夠鐘食晚飯，
今次我地留晌酒店中菜廳食飯，
今餐再無黃鱔煲仔飯食，今次夠特別啦，我地食白飯。
Jack 哥仲加送『巨型鵝蛋』，然之後再示範『生雙蛋溝白飯』。
最後，版友 ST 眼見大家餓雞餓左太耐，所以出錢請大家食隻炸子雞。

星期五，香港花展。

前幾年既花展，都因為無假，所以無去。

今年，特別同公司拿左假，第一日一早去。

可惜，當日天色唔好，人非常多，而花又唔靚，

影左陣，都無心機影落去。

*

夜晚，去左 R 公仔屋企食飯飲酒，

佢黎越黎似一個住家男人，哈。

*

星期六，花展影得唔多喉，再去多次香港公園。

*

晌 R 公子屋企，掛左 2 個好大既相片套，

可以插好多張 4R 相。個相片套，係佢 2 公婆晌泰國買返黎。

佢話晌香港 homeless 見過類似既，不過價錢就要十倍了。

影完，去銅鑼灣行左陣。

行經 homeless，除左比我搵到佢講果個相片套，

仲比我搵到個 2 米高，可以放晒橫值倒相既長條套，

心大心細，唔知買邊個好。最後，全部買晒。

*

夜晚，Joe 生日，包左場。

上演左一場 喜力 300，一個人力敵我地五十幾人，

結果非常盡興。

近年，盡量唔好比自已飲太多，

因為，我一飲得多，就會發傻，醜態盡現。

*

以前，同 R公子佢地飲，飲親都發狂，

最後比班傻佬改左我個名做 Crazy，

何想然之，飲酒之後既我係幾狂。

*

因為醜態盡現，所以真係決心盡量飲少 D，

盡可能晌屋企飲算。

 

上年既三八，係 R 公子同呀山既大婚之日，
當日忙到自已生日都唔記得。
咁就過完三八，好快又一年，
岩岩收到個好消息，可以話係最好既生日禮物，
今年無咩望，希望R 公子同呀山，
肥肥白白，健健康康。

*

星期五晚， Joe 知我生日，
約左班朋友上 Show 飲野，就連好耐無見既 企理 都有黎，
風仔就明明返緊流水鄉都出返黎灣仔，
都算係咁，多謝多謝。

飲完，例牌去華南食碗肥腸腩米，
本來醉左八成，食完個人醒晒。
返到屋企，都五點。

*

訓得四個鐘，又醒，
最近唔知做咩，訓得好差，唔係訓唔著，就係咁醒。

*

中午，無野做，又去左香港公園影相。
上個星期影果時都覺怪怪，
原來 set 錯野，搞到影唔到 marco。

*

星期六，我來無約人，諗住留晌屋企算。
不過同事見我咁，從以就約埋我去食飯，

食完飯，仲走左去唱 K，結果又搞到五點幾先返到屋企。

*

其實，我對乜乜生日，咩大時大節並唔係好著緊，
尤其依幾年，對於自已既生日簡直係睇化左。
覺得，生日，朋友記得，同自已講聲生日快樂咁緊係開心，
但如果朋友唔記得，唔知道咪算，無所謂架。
要記得既，自然會記得，何必強求。
何況，記得，唔記得，又唔代表咩野，
朋友並唔係咁計算。

*

收到同事送既禮物，好實用、好好用，多謝。
尤其係玩左幾晚，整返個 mask 先似返個人樣。

舊區重建，係建基於舊區保存同更新，
定係先毀滅，而再建新物業。
舊區重建，講就好好聽，其實只不過將舊區清拆，
之後再比地產發展商起過晒 d 新樓，將舊區變成新區，
起三個 APM，四個又一城，再加個初豪坊，咁樣係唔係重建呢？

*

星期日，參加左 學聯社會運動資源中心 主辦既 觀塘文化導賞團，
個團，中午兩點出發，五點完成討論結束。
短短三個鐘，只可以作為一種簡短既介紹，
而行既路線，主要都係今次重建既範圍，由物華街，協和街到裕民坊。

首先，主講 原人 帶左我地去興順大廈。
興順大廈 樓高十五層，從大廈天台，可以望到大半觀塘舊區。

*

晌天台，原人大約講解一下整個重建計劃，
重建後，眼前既就係五層約五十層高既住宅，約二千個單位，七至八千蚊呎。

而裕民坊街邊鋪仔、舊唐樓，就會變成豪華商場、酒店同埋巨蛋型政府合署。
舊有既 GOPC 同政府合署，就會變成七十層高既高級商廈。

好得意，每層樓版樓梯口都有個化寶盤，唔通佢都係公家既？

天台，平時除左比 D 住客上曬衫之外，
原來仲會用黎住客間聯誼，有時一班人上黎吹水， 聽講，仲會上去 BBQ….

*

離開興順大廈，途經銀都戲院，
屹立逾四十幾年既銀都戲院，原來當年係好出名既左派戲院，
晌中共統戰其間，更加係兵家必爭之地，
六七年暴動之後，幾乎清一色播放革命、抗日電影。

下一站，就係去對面裕民大廈參觀籠屋，
其實晌興順大廈梯間，己經見到裕民大廈 d 天台屋。

裕民大廈，可以講係晌觀塘區比較舊既建築物，
八層高，無電梯，走廊比較昏暗，牆身、電線外露。

行過一條昏暗既走廊，上到二樓，就見到傳說中既洛奇健美中心。
以前每次見到依類健身中心，總覺得唔係正經人去既地方，
覺得一定係黑社會既習訓營，紋身佬既木人行。

以為佢好平，但原來月費比 physical 仲要貴， 比 Califomia 只係平少少。
聽 原人 講原來 健身院，原來晌觀塘區開左好多年，晌健美比賽仲獲獎無數，
廿四小時開放，去學既並唔係我想像中三山五惡既人。

學員一般都係觀塘區土生土長既居民，亦有唔同既少數族裔，
甚至有教書老師，高級警務人員，每個學員，都因為唔同原因而來。

洛奇健美中心 真係唔係一間普通既健身院。
因為佢除左健身院之外，有時仲係拓兒所，幫街坊睇住 d 細路。
有時佢係補習社，教學生做功課。
有時佢係職業介紹所，提供求職意見。
好多時，健身院都扮演左社區服務既角色。
大家守望雙助，可能就係舊社區，舊店鋪既特色。

*

原人話，如果重建，老細就唔會再做落去。
重建後，本來既人制網路，街坊關係都會變得面目全飛，
更加無可能同大型健身院競爭。

健身院由全盛時其既六百幾個會員， 到而家得返一百個會員，
但老細可以細訴出每個會員背後既個故事。
特發奇想，如果將果一百個會員既故事都記錄落黎， 我諗都幾有趣。   

*

晌樓梯間，不時會發現牆上寫住好多人名，
原來，南亞族裔人士，係興將自己個名寫響牆上面，
就好似門牌一樣咁，講比同鄉知佢係住晌果層。

行多幾層，就見到籠屋既門牌，門口個有一塊寫左唔同時間既黑板。
話說五六十年代，觀塘南區係一個工業區，由於當時既交通並唔係好似而家咁。
工人出入觀塘好唔方便，但工人又負擔不起租金去租獨立單位，
只有居住在平價既「籠屋」中，過住日出左作，日落而息既生活。

大多數籠屋，都係晌舊式唐樓入面，一個單位入面放滿二至三層高既碌格床，
每張床位只有兩尺半左右既木板，四邊用鐵絲網圍住，一邊作出入此床用。
而個人雜物就放晒晌自己床位，如果住客外出，就會將鎖上鐵絲網，保護自己財物。

相中既黑板，其實係一塊「叫床板」，住客寫底起身返工時間、床號，
每朝就會有人叫佢起身返工。

到八十年代，香港房屋居住環境、交通都陸續改善，
加上工廠北移，令好多人都搬入新型既公共房屋，而「籠屋」亦日漸息微。
今日見到果間「籠屋」，因為無乜人住，環境亦己經無以前咁擠迫。

以前，總覺得籠屋治安唔好，但原來仲住緊既住客，
大都係住慣左既人，有住客甚至住左幾十年，大家變得彼此認識，
反而己經無左「上鎖」既習慣。

*

離開籠屋單位，行多層樓，就上到天台。
上到去，又係另一個景像。
首先見到見到密麻麻一排天台鐵皮木屋，屋外，擺放左雜物。
之後就見到共用既廚房，同埋一個共用既大廳同天井，
我地上到去果時，住客都坐晒晌度，聚精會神咁睇緊 「肥肥」既道別會。

*

落返地下，就會見到個樓梯檔仔，
樓梯檔既位置其實唔屬於業主，亦唔屬於政府。
因為，本來依類樓梯檔仔，晌大廈最初設計根本唔存在架，
好多時都係「霸」返黎，之後慢慢先伸請水、電、地址，
所以重建，依類檔仔未必有賠償。
而依間樓梯檔仔，又係另一個故事啦。

唔知點解，樓梯走廊好多依種上左鎖既木箱，上面仲寫住…….

* 

離開裕民坊，穿過臨時左好多年既  臨時街市，就會到達仁信里。
果道，有間協和街街市的國際鴿舍，係全香港唯一可以買到比賽用賽鴿既地方，
老闆更加晒鴿賽獲賽無數。

問老闆呀媽，政府就黎重建，佢地諗住點？
婆婆答我，到時先算。話重建話重建都講左十幾年，到今日都係得個講字。
都唔知係咪真既。

睇完鴿，之後轉入剪髮街，
話係剪髮街，其實只係一條後行，入面放左幾張舊式上海剪髮凳。
客人，就坐晌上面剪頭髮，而身邊既行人就係咁走過。

老闆好有霸氣，亦講明唔想自己既客人晌未得同意之下上鏡，
所以唔比人影相。老闆會請 D 上左年紀既師父返黎做野，
咪以為老人家就睇少人，原來 D 師父人高唔低架，起碼自力更生。

行完剪髮街，今次既導賞團都差唔多到尾聲，
通過今次既導賞團同埋討論之後，加深左我對舊區既認識。
對於舊區既消逝，我地只能無奈接受。
究竟現代化，係唔係就代表社會進步？
社會發展經濟同時，係唔係應該考慮下點樣保存街坊建立既互助文化？
政府一方面希望大家守望雙助，另一方面又不斷冷莫社區。
一個社會，係唔係唔能夠容納唔同經濟運作、生活模式方式？
係唔係所有人都變成一樣，咁樣就係好？

*

舊區重建，業主當然想盡快賠錢走人。
當然好多人認為這些舊店應該盡早清拆，
而最低層既市民呢？可以表達到咩意見？

如果拆晒，取而代之興建既大型商場同屋苑，咁樣就叫進步？
當有一日，所有士多都變左 7-11，所有雜貨鋪變成超級市場，
所以店鋪都變成連所店，咁樣就係先進？

究竟，咩野系社區既靈魂呢？
相信依類店鋪同街坊彼此守望相助既關係，而家好難再搵到。
舊區重建，其實係重建舊區既建築物，定係重建舊區既人與人之間關係？

將舊區既行業同文化趕走，而重建後又不獲新生，社區步向凋零。
新既社區，充滿浮誇既外型，但再無靈魂，
就好似一個再無靈魂既軀殼，外表再靚，內裡都係無內容。
可能依種  無靈魂既軀殼，就係香港將來既寫照。

星期六，好忙好忙，好多野做。

九點幾起身，就去車公廟拜神。

由有車之後，就習慣左每年年頭拜神，

年尾還神，我諗都好多年了。

其實我並唔係咁迷信，不過，求個安心。

*

拜完神，就去剪頭髮，

而家份工，返工放工定時，

剪開個髮型師仲早過我放工，

搞到只有放假先可以去剪頭髮。

個髮型師，都幫我剪左三四年頭髮，

一直都無轉過，可能我唔習慣轉變。

*

剪完頭髮，見仲有時間，就去洗車。

好耐無洗車，架車污糟都無人有，

夏天，都會自已洗下。但冬天，真係比人洗算。

*

食完個外賣，就出香港公園影相。

好耐無影花啦，就黎花展啦，趁有時間，好去練習下。

原來今年個主題原來係太陽花，而太陽花係我好鐘意既花，

咁唔去唔得啦，而我自已最鐘意既花，其實係荷花。

*

去到香港公園，發覺好多太陽菊。

太陽菊，並無蘭花既高雅柔情，無百合既高貴純潔，

亦無玫瑰既嬌羞豔麗，更無鬱金香既繁盛姿采。

太陽菊，花語係熱情、活力。

同我性格剛好係相反，正因為相反，所以響往。

以前我女友一唔開心，我就會一邊扮太陽花，

一邊講，”太陽花，笑哈哈” 去”乙水”佢笑。

對於唔習慣笑既我，每次見到太陽菊、非洲菊依類花，

總覺得佢地向我發出微笑一樣。

*

*

響香港公園入面，竟然比我發現大老鼠………..

唔係，係大松鼠先岩。

其實，我都係第一次見板鼠。

*

影完相，之後就去左士丹頓街睇呀妹搞既相展。

相展內容普通，不過佢週圍既環境就好吸引我，

聽講，果個舊區，好快又會比人重建，

我諗下個星期搵個時間去影下相都好。

響相展入面，巧遇 Mr Evangelo COSTADIMAS，

EC 就係我上星期響上海街果個相展入面位攝影師，

原來，佢係我呀妹既同學。

*

星期六日，屋企人例牌去晒蒲。

唔想再食外賣，只好自已落手落腳整。

是日晚餐，

香草煎羊扒三件，

清拾豆苗，

餐飲係兩支啤酒。

飽晒。

沉晚又飲到半夜，返到屋企都五點幾。

*

今日無所事事，

去左聽學聯社會運動資源中心搞既文化導賞團簡介會。

聽完，行經上海街，睇左 de consequences。

晌上海街入面，比我見到張咁既傳單。

 

 

…..個主題咁熟既？ Kong Lui？港女？

Curated by Vesta Cheung……

疑？咪係我呀妹！！！

衰妹，己經開始左都唔通知我一聲，

下星期搵日去睇下先。

沉日放工無野做，

一個人走左去睇 “潛水鐘與蝴蝶” (The Diving Bell and the Butterfly)，

電影，無好多煽情既劇情，反而加入一些幽默的自嘲。

 

 

攝影以特別既第一身拍攝手法，只有一隻眼望到既迷焦既景像，

令到觀眾可以切身感受到一個全身癱瘓望到既世界。

其間有幾場，主角以自已困在 Diving Bell 之內來比預自已既處景，

在深海靜寂無聲，自已四支不能動，世界無聲的停頓。

主角父親亦自嘲，自已行動不便，是困在家中房間中，

而兒子就是靈魂困在肉體中，大家都是一樣困住了。

 

主角因為 Locked-in Syndrome 令全身癱瘓而有想死既諗頭，

但到得醫護人員、家人、朋友既支持，

由放棄變到努力，令用想像力，沖破左潛水鐘既枷鎖，

化身為蝴蝶，不受約束，利用幻想同回憶，

最後很完成自身既傳記。

 

電影，題才沉重，但無濫用煽情，

拍攝，比人一種淡淡然既唯美感，雖然套戲節奏比較慢，

但我本身就係一個慢熱、淡淡然既人，反而睇得好舒服。

*

夜晚同醫院既同事食飯，之後唱 K。

仲要唱到天光先返屋企，真係好多年未試過。

原來，我有成年無去過 K。

原來，我六年以來，無同同事出過街，

原來，一直以來，我跟人既關係，都會保持一定距離。

原來，係我封閉左自已。